მეცნიერებმა დაადგინეს, რომ გალაქტიკები შემაშფოთებელი ტემპით კარგავენ ენერგიას და ადასტურებენ, რომ სამყაროში არსებული მთელი ენერგია საბოლოოდ არაფრად იქცევა. 200 000 გალაქტიკის შესწავლამ აჩვენა, რომ მათ ენერგიის ნახევარი მხოლოდ 2 მილიარდ წელიწადში დაკარგეს. „სამყარო ნელ-ნელა კვდება”, ავისმომასწავებლადაა აღნიშნული ევროპის სამხრეთული ობსერვატორიის განცხადებაში.

თეორია, რომ სამყარო კვდება ენთროპიის ზრდის გამო, ახალი არაა, თუმცა ეს გახლავთ ყველაზე ვრცელი ანალიზი იმის შესახებ, თუ რა ხდება რეალურად. ყველაზე ზუსტად გაიზომა ენერგიის გამოყოფა კოსმოსის მსხვილი მონაკვეთების მიერ, რომლებიც გალაქტიკებს შეიცავენ. კვლევა განხორციელდა 21 სხვადასხვა ტალღაში, დაწყებული ულტრაიისფრიდან დამთავრებული ინფრაწითლით და აღმოჩნდა, რომ ყველა მათგანი მცირდება. კვლევა შედის GAMA-ს (Galaxy And Mass Assembly survey) პროექტში, რომელიც კოსმოსის შესასწავლად მსოფლიოში უძლიერეს ტელესკოპებს იყენებს.

„ჩვენ გამოვიყენეთ ჩვენს ხელთ არსებული ყველა კოსმოსური თუ დედამიწაზე მდებარე ტელესკოპი, რათა გაგვეზომა ენერგიის გამოყოფა 200 000-ზე მეტი გალაქტიკის მიერ ტალღების იმდენად ფართო სპექტრში, რამდენადაც შესაძლებელი იყო”, განაცხადა GAMA-ს მკვლევართა ჯგუფის ხელმძღვანელმა საიმონ დრაივერმა ავსტრალიაში მდებარე რადიოასტრონომიული კვლევის საერთაშორისო ცენტრიდან (ICRAR).

ვარსკვლავები იყენებენ თავიანთ საწვავს და სინათლისა და სითბოს სახით გამოყოფენ მას. როდესაც ვარსკვლავები სიცოცხლეს ასრულებენ კატაკლიზმური ზეახლის აფეთქების სახით, შესაძლოა დასაბამი მისცენ ახალ ვარსკვლავებს, მაგრამ საბოლოდ მთელი მათი ენერგია იმდენად ფართოდ გაიშლება, რომ ახალი ვარსკვლავების წარმოქმნა ვეღარ მოხდება. შესწავლილ გალაქტიკებში ვარსკვლავების ფორმირების ტემპი ორჯერ შემცირდა 2 მილიარდ წელიწადში. მკვლევარები აღნიშნულ დასკვნამდე ძველი და ახალი გალაქტიკების მიერ გამოყოფილი ენერგიების შედარებით მივიდნენ.

„საბოლოოდ სამყარო დაბერდება. ის სულ უფრო მეტად ბნელდება. სამყარო სულ უფრო ცივი და ბნელი ადგილი ხდება”, ამბობს ჰამბურგის უნივერსიტეტის პროფესორი იოჰენ ლისკი, რომელიც კვლევაში იყო ჩართული.

ეს კვლევა, რომელიც საერთაშორისო ასტრონომიული კავშირის XXIX ზოგად ასამბლეაზე წარადგინეს ჰავაის ქალაქ ჰონოლულუში, მცირეოდენად განსხვავდება სამყაროს აღსასრულის შესახებ არსებული სხვა თეორიისგან, რომელიც ცნობილია, როგორც ცხელი სიკვდილი. მის მიხედვით, სამყაროს გაფართოების ტემპის მატების შედეგად ყველაფერი იმდენად გაიშლება, რომ ერთმანეთთან კავშირი აღარ ექნებათ. როგორც ლისკი ამბობს, „სამყარო მრავალნაირი სიკვდილით კვდება”.

ჯერჯერობით მეცნიერები ზუსტად ვერ ამბობენ, რომელი ვარიანტი განხორციელდება პირველად. „ეს დამოკიდებულია იმაზე, რამდენად დიდია სამყაროს გაფართოების ტემპი”, ამბობს ლისკი. „ამ კითხვაზე ზუსტი პასუხი ჯერ არ გაცემულა. ჯერ არ ვიცით, რა იწვევს აჩქარებად გაფართოებას”.

თუმცა სამყაროს ცხელ სიკვდილს მილიარდობით წლები სჭირდება. სავარაუდოდ მანამდე გალაქტიკებს უკვე გამოცლილი ექნებათ ენერგია და ეს ის სცენარია, რომლის თავიდან აცილება შეუძლებელია. „ჩვენ უდავოდ ამ გზით მივდივართ. უკუპროცესისთვის საჭირო იქნებოდა კოსმოსური პროცესი, რომელიც შეცვლიდა სამყაროს და გააბათილებდა მსხვილ ფლუქტუაციებს. ჩვენთვის ცნობილი არაა პროცესი, რომელსაც მსგავსი რამ შეუძლია”.

როგორც ზემოთ იყო აღნიშნული, ეს ყველაფერი მილიარდობით წლების შემდეგ მოხდება, როცა ყველა სინათლე გაქრება და დედამიწიდან ვარსკვლავები აღარ გამოჩნდება. მანამდე კი, რამდენიმე მილიარდ წელიწადში, დედამიწას წითელი გიგანტის ფაზაში შესული მზე შთანთქავს, ხოლო შთანთქმამდე პლანეტაზე ყველანაირი სიცოცხლე მოისპობა და უკაცრიელი და არასტუმართმოყვარე ადგილი გახდება.

წყარო: www.21c.ge